LA PARÒCHIA ORTODÒSSA DËL PATRIARCÀ ËD MOSCA A TURIN
La paròchia ortodòssa dël Patriarcà ëd Mosca a Turin a l'é dedià a San Massim (V sec.), prim vësco dla sità e Pare dla Cesa. La festa patronal a l’é ël 25 giugn (8 luj për j’ortodòss che a van daré al vej calendari).
La paròchia a l’é staita fondà ant la Diocesi ëd Chersoné, tanme le autre cese dël Patriarcà ëd Mosca an Fransa, Italia, Svissera, Spagna e Portogal.
Na comunità d’ortodòss italian a l’ha dait origin dël 1993 a la paròchia ëd San Massim dël di d’ancheuj. Al comensi ëd soa vita a l'avia nen na sede permanent, e a l'é staita ospitata an vaire pòst dla sità anans dë stabilisse dël 2001 a la cesa dël Santissim Redentor (v. fòto), an sla prima colin-a ëd Turin.
Le funssion a seguo ël Tipich eclesiastich (model ëd nòrme e rubriche dël cult) dla Cesa russa; la lenga che as dovra ant le celebrassion a cangia conforma la proveniensa dij fedej: cole pì dovrà a son l'italian, lë slav eclesiastich e ël romen.
Da na mira dij numer la pì part dij fedeli a ven da la Republica ëd Moldova, ma con na bondosa presensa d’ortodòss ucrain, russi e italian e bele d'autre nassionalità (Bielorussia, Romania, ex-Yugoslavia, Georgia, Bulgaria).
Ant lë spirit missionari che da sempe a l’é tipich dla Cesa russa, nòstra paròchia, tacà a sò deuit ëd servissi pastoral dij fedej dël Patriarcà ëd Mosca (e donca dj’ortodòss ëd tradission slava) an Piemont e Valdosta, a sërca d’agrandì na comunità local genita e tuta dedicà a testimonié la Fé ortodòssa an Ossident.
Ant l’anandiament ëd la paròchia j’ortodòss italian a son dasse da fé nen mach com organisador, ma belavans ant l'acheuj dij fedej imigrà an Italia.
A rësguard ëd tuti j’anteressà a la vita della paròchia, i sërcoma ëd travajé a pro ëd la mediassion cultural dël messaggi dl'Ortodossia, dzortut con la tradussion an lenga local dij test liturgich e innografici dla Cesa.
Convnù che la testimoniansa della Fé ortodòssa a peul nen esse dësgionta da l'arserca ëd relassion ideaj con ij rapresentant ëd le autre confession cristian-e, nòstra paròchia a ten an pé un dialogh ativ an sij tema dle vrità ëd fé con ij cristian ëd j’autri cult a Turin.
I soma tutun obligà a arfudé minca proposta ëd concelebrassion ecumeniche (che a van a l’arzigh ëd minimalism dogmatich e soens ëdcò a col ëd confusion da la mira simbòlica). I l'oma car pitòst smon-e l’ardëscoerta dle rais dël cristianesim (e ëd tut lòn che i l’oma dësmentià ëd nòstra tradission eclesiastica comun-a) e travajé ansema a l'acheuj dj’imigrà e soa antegrassion ant la vita ëd nòstra sità.
Tuti a san che un dij problema ëd bas dël cristianesim a l’é mantnì la vita ëd comunità; për noiautri a l’é cost n’ideal che a l’é mincatant malfé da realisé. Nòstre cese a son faite da gent ëd livej sociaj e culturaj bin diferent e ant l’istess temp separà da confin lenghistich e mentalità leugne antra ëd lor.
Bele se la paròchia a l’ha gnun finansiament e as sosten mach mersì a la generosità ëd tuti ij fedej, i podoma nen dësmentié che motobin d’ortodòss che a son imigrà nen da vaire a son an condission econòmiche bin grame: a randa dël servissi cultual e a la vita ëd preghiera is doma donch da fé për sostnì për lòn che i podoma coj che a l’han pì da manca.
Për savejne ëd pì:
DAIT GENERAJ AN SLA PARÒCHIA
|
